Suvënz suzedel che l zitadin/la zitadina fej ora n termin per na vijita dal dutor o vel’ autra prestazion sanitera y l/la ne se prejënta nia, zënza desdì. Chësc cumpurtamënt sëuracëria l servisc saniter y va a dann di autri pazienc: desdì la prenutazion per tëmp uel dì lascé liede l post a zachei d’autri che l adrova y nes juda ënghe a miuré nosta efizienza. Per chësta gauja iel da paië na straufonga aministrativa de 35,00 € (plu la spëises de nutifica) per la vijites apustedes y nia desdites per tëmp.
Per ciuna prestazions iel pa da paië la straufonga?
La straufonga aministrativa vën rateda per uni termin de na prestazion spezialiseda te ambulatuere fata ora y nia desdida tl tëmp y tla maniera udui dant.
La straufonga aministrativa ie da paië per duc i termins de prestazions spezialisedes te ambulatuere che vën tëuc y nia desdii, tl cajo ulache l pazient/la pazienta ne se prejënta nia.
N particuler iel udù dant la straufonga per chisc termins che ne vën nia tenii ite:
- per la prestazions dl prim iede (prima vijites spezialisedes y prestazions de dianiosa y de terapia dl prim iede);
- per la prestazions dl iede do (vijita de cuntrol, prestazions de dianiosa y de terapia dl iede do, follow-up);
- per la prestazions dl prim iede tl ciamp de n zitlus de prestazions (coche la prestazions de reabilitazion);
La straufonga aministrativa ne n’ie nia ududa dant per chisc termins tëuc y nia desdii:
- termins scric ora cun priorità tlinica de urgënza;
- termins ulache l ie manco de doi dis de lëur danter la data de prenutazion y la data dl termin;
- termins ti dis ulache l ie udù dant n scioper a livel naziunel y/o provinziel y a chël che tol pert l personal saniter dependënt dl’Azienda Sanitera o cun cunvenzion;
- termins che toma ite tl’atività dl dutor fata per si cont tl’Azienda Sanitera;
- termins dan y do vester stac stazioners tl spedel;
- vijites fates do la prima prestazion de n zitlus (l ie da auzé ora che te chësc cajo ne n’à l pazient/la pazienta nia l dërt de adurvé te n segondo mumënt l termin arjumà y nia desdì ti tëmps y tla maniera udui dant);
- termins dac ora dal’Azienda Sanitera (per ejëmpl dlaveies de ublianza; prestazions ududes dant ti programs de screening, y n.i.) o su dumanda de istituzions o autoriteies coche la sunieria, la perjon, y n. i.;
- prestazions te ambulatuere fates ti raions saniteres sëurantulan l pazient/la pazienta: servijes per dependënzes (SERD), servijes psicologics, zëntri per la sanità mentela, servijes pneumologics, servijes de cura paliativa;
- prestazions te ambulatuere fates dai servijes psichiatrics te spedel o tl raion saniter, cun leprò la neuropsichiatria di popsc y tl’età dla junëza (NPIA);
- prestazions te ambulatuere per pazienc che fej chemioterapia y radioterapia;
- prestazions ti ambulatueres dl spedel y dl raion saniter per malaties da taché;
- prestazions fates te cësa Duc i autri caji che ne toma nia ite tla prestazions spezialisedes te ambulatuere (nia caraterisedes dala sigla “PSA” coche udù dant tla delibrazion dla J.P. nr. 2568 / 1998).
Co possi pa desdì l termin?
Te posses desdì l termin tres telefon, de persona ti ufizies de prenutazion o tres e-mail. La desdita muessa unì fata al plu tert doi dis de lëur dan la vijita dal dutor.
Pudëis desdì l apuntamënt cherdan su l numer de CUPP (servisc de desdita automatica atif 24 ëura sun 24). Pudëis desdì nce online dajan tres l numer de apuntamënt che ie scrit sun l promemoria o l numer de desdita che ve ie stat mandà tres sms. N possa nce desdì tres e-mail o de persona passan al ufize de prenutazion.
L muessa vester almanca doi dis de lëur danter la desdita y la vijita. La sada y la dumenia ne vën nia tëutes n cunscidrazion.
Per ejёmpl:
- Sce te es l termin de lunesc
iel da desdì al plu tert n mierculdi dl’ena dant. - Sce te es l termin de merdi
iel da desdì al plu tert n juebia dl’ena dant. - Sce te es l termin de mierculdi
iel da desdì al plu tert n vёnderdi dl’ena dant. - Sce te es l termin de juebia
iel da desdì al plu tert n lunesc. - Sce te es l termin de vёnderdi
iel da desdì al plu tert n merdi.
Per se lercurdé l termin iel n servisc automatisà che cherd su l pazient set dis dant. L termin po unì cunfermà o desdì cun i numeri dla tastadura sul telefon.
Uni iede che desdijes n termin giapes n codesc. Tëniel su, l ie la prova che te es desdì ala drëta maniera.
Co vëniel pa a se l dé la straufonga?
Tl cajo che l vën cunstatà na viulazion te vëniela nutificheda y te es 30 dis per la paië.
Sce ne te es nia desdì l termin dla vijita dal dutor ti tëmps udui dant, te nutificherà i dirijënc aministratifs di raions saniteres de referimënt la straufonga ududa dant. L verbal de azertamënt dla viulazion y la cuntestazion dla straufonga aministrativa unirà fac tl tëmp de 90 dis per l zitadin/la zitadina cun residënza tla Talia y tl tëmp de 360 dis per chëi/chëles che à la residënza oradecà. La cumpëida di dis mët man cun l azertamënt dla viulazion.
L paiamënt dla straufonga, 35,00€ (plu la spëises de nutifica), muessa unì fat nchin a 30 dis da canche n à giapà la nutifica dl verbal de azertamënt, tres l portal pagoPA.
Possi pa me giustifiché sce giape na straufonga?
Mé te n valgun caji posses te giustifiché cun na documentazion aldò, sce ne n’es nia desdit l termin
L regulamënt vëija danora che te ies giustificà te n valgun caji canche ne posses nia desdì per tëmp n termin. Te chisc caji muesses prejenté, ti 30 dis do la nutifica dla viulazion, na documentazion scrita tulan ca i formuleres metui a despusizion dal’Azienda Sanitera.
La documentazion de giustificazion ie da prejenté a chësta maniera:
- tulan ca i formuleres da scrì ora che ie sun la plata web dl’Azienda Sanitera de Südtirol
- tres posta cun na lëtra recumandeda cun resposta A/R al’adres:
Commissione aziendale di valutazione mancate disdette
presso Ripartizione Prestazioni sanitarie ed Assistenza territoriale
Via Thomas Alva Edison 10/D
39100 Bolzano
Kommission für unterlassene Absagen
Abteilung Gesundheitsleistungen und wohnortnahe Versorgung
Thomas-Alva-Edison-Straße 10/D
39100 Bozen - tres posta zertificheda (PEC) al’adres:
strafe.sanzione@pec.sabes.it
Le domande presentate per posta elettronica tradizionale non sono ammissibili e non saranno ricevute dalla casella PEC! - de persona ti raions saniteres dl’Azienda Sanitera de Südtirol. Cëla la lista sun la plata www.asdaa.it/it/distretti-sanitari.asp
Te duc i caji iel de bujën njunté o mustré n documënt de identità o, sce ne te posses nia jì de persona y delegheies n sostitut iel da njunté na delega scrita y la copia de ti documënt de identità.
La documentazion unirà cialeda tres dala Commissione aziendale di valutazione mancate disdette / Kommission für unterlassene Absagen metuda adum da trëi cumëmbri. Ti 180 dis do avëi dat ju la documentazion de giustificazion, te fajerà l dirijënt aministratif, do avëi giapà l bënsté dla cumiscion, al savëi che:
- l unirà archivià l fat dajan la comunicazion al zitadin/ala zitadina y ala Repartizion economia y finanzes (Ripartizione Economico Finanziaria / Abteilung Wirtschaft und Finanzen) acioche la straiche l credit scrit ite
- l unirà fat la nutifica dla urdenanza de paiamënt mutivà. Leprò vëniel nce la spëises de nutifica y l paiamënt muessa unì fat ti 30 dis do che n l à giapà sun l portal pagoPA. N chësc cajo posses mo fé recurs tla manieres, ti termins y ti tëmps udui dant dala lege.
